CY力撐對社會有「言責」 范太梁振英隔空開火

(明報)2010年7月2日 星期五 05:05
【明報專訊】全國人大    常委范徐麗泰    前日同傳媒茶叙時，踩到行政會議    召集人梁振英    （ＣＹ）上心口，話佢唔適合做特首。范太今次發火真係非同小可，噚日喺回歸13周年酒會，一班記者當然要問CY嘅回應。

不過，等呀等，CY一直都唔肯行去記者區，後尾嘉賓走得七七八八，成個會場愈嚟愈疏落，CY仲同其他嘉賓雞啄唔斷，完全無離開意欲。結果等咗成粒鐘，CY終於較腳走人，但佢一支箭咁離開會場，唔肯接受記者訪問。一眾行家自然死追，點知CY就拎咗個電話出嚟講呀講，全程都無放低過，最終仲入埋升降機走人。

梁傾電話避記者

CY咁避忌，Emily以為佢想低調處理件事，點知返到公司無耐，就見到佢喺網誌發表文章，仲同范太隔空開火。CY話，行會非官守成員對房屋問題發表意見，至今都無違反行會制度同規則，亦唔係只得佢一個行會成員咁樣發表意見。CY仲話，行會成員要遵守制度和規則，但對社會都有「言責」，即係有真知灼見就要講咁話囉。